【Report|レポート】同日本人討論,佢哋睇唔見的外國人/日本人と一緒に「見えない外国人」について話す
IMMレクチャー・シリーズ「多文化社会におけるアートのチカラ」
第1回 “遅れてきた移民国家”における不可視な外国人たち
企画担当者 楊天帥(Yeung Tinshui)
東京藝術大学大学院・国際芸術創造研究科博士後期課程 所属
是咁的,我係東京藝術大學「國際藝術創造」系嘅博士生。
老細要我幫手搞個 PROJECT,
叫做「IMMIGRATION MUSEUM TOKYO (IMM)」,
即係東京移民博物館。
無咩嘅,咪做囉。
首先各位巴絲一定覺得我好騎呢,
點解要用港式廣東話寫呢篇文。
其實是我老細叫的。
我老細係日本人,梗係唔識睇。
我個 DEPT 亦無香港同學,
所以應該無人知做乜。
寫文無人睇的感覺幾搞嘢。
有啲似全世界死剩你一個人類,
你喺山洞入面刻啲字,
希望他朝有日唔知咩神秘人定外星人,
會發現。
ANYWAY,總之我就用緊廣東話寫一個日本講座嘅 REPORT。
點解變成咁呢,有段故。
首先解釋吓咩係 IMM。
佢其實係一個藝術計劃。
雖然叫做博物館但無實體。
佢係屬於一個叫做「ART ACCESS 足立-音樂之都千住之緣」(自己譯)嘅計劃一部份。
呢個計劃學校有份搞(或者話係主導)
所以就要我做。
呢個 IMM,
係會搞啲展覽啊活動啊嗰啲,係同移民有關。
佢下年諗住做個大型展覽,
做展覽之前要先做五場講座,
個講座系列叫做「多文化社會入面藝術嘅力量」,
聲稱話要一齊從多文化與藝術角度,
諗下居住在日本嘅外國人此時此刻嘅生活。
咁我幫手搞呢個,就係第一場。
呢場講座是喺七月廿七號嘅。
係,正正係「光復元朗」嗰一日。
好啦,我唔是想講呢個,
因為呢個 REPORT 唔 SUPPOSE 寫我嘅心情。
總之,講座時間係一點半鐘開始,至四點鐘結束。
講者係「日本複雜紀行」總編輯望月優大,同埋 IMM 個「主辦人」岩井成昭。
觀眾人數係四十四人個。
地點係東京藝術大學北千住校園。
負責主持嘅,
係下年 IMM 展覽真正做嘢嗰個人,
係我師姊嚟嘅,是台灣人,
叫楊淳婷。
我就負責做 MODERATOR。
其實我日文唔算太好,
日常對話問題唔大,
但要 HOST 講座,絕對唔掂。
不過,我唔記得邊個同學提議,
話既然係同移民有關,
咁用個日文唔太好的人做 HOST 都合適。
我覺得啱嘅。
觀眾連我的日文都接受唔到的話,
唔好講咩關心移民。
個活動流程是,
先由楊學姐介紹成個大 PROJECT,
然後我就介紹阿望月 SAN 本書。
佢最近出咗本書,個名叫「兩個日本﹕移民國家的建前與現實」。
所謂「建前」,就係日本人表現嘅言語行為,
相反就係「本音」,即係真心嘅意思。
所以「建前」大概可以理解為「門面」。
呢本書就係講日本人「門面」對移民問題是一套,現實又是另一套。
我就要負責整理本書嘅內容,整個 PPT 介紹一下個情況。
然後就係望月 SAN 同岩井 SAN 嘅對談。
佢哋對談內容自然是十分多而豐富啦,
字數所限,我只揀兩點來講。
第一點係岩井 SAN 提出嘅,
望月 SAN 在總結時亦話係印象最深刻。
呢個 POINT 更同香港有啲關係。
就係,原來喺波斯尼亞和黑塞哥維那莫斯塔爾市有一個李小龍銅像。
點解會有李小龍銅像?
呢個像揭幕於 2005 年。
整個像嘅藝術家叫做 Ivan Fijolić。
點解會有呢個像?
原來 1992 年至 1995 年間,三年嘅波斯尼亞戰爭
令到穆斯林、克羅地亞人同塞爾維亞人
產生好大隔閡。
但係佢哋都有一個共通點,
就係都好崇拜李小龍。
於是 2004 年,當地一個青年組織就計劃建造呢座李小龍像,
期望可以消除各族群之間嘅隔閡。
藝術家本人亦話:建立呢個李小龍銅像,目地係令大眾記住李小龍
「忠誠、友誼、技藝與公正」嘅品格。
第二點亦係回答我點解要用廣東話寫呢篇文。
就係,對談中我 AS MODERATOR,問佢哋,
兩位都認同多文化好重要,要喺日本實踐,
咁請問生活實際上,是要點實踐呢?
咁望月 SAN 就直接提到話係語言。
具體來說就係生活上,
唔識日文,或者唔熟日文嘅人,
是咪可以同日文母語嘅人共存,
而唔會( 或較少)有生活上嘅不公同不便。
更進一步講,
語言其實係,我哋嘅世界觀。
因為人是要靠語言才能理解事物的。
比如話,你肚仔感到唔舒服,
好想搵啲嘢吞落個肚度,
呢啲是感覺,無語言都會有。
但你要認識一個字叫做「餓」,
先會整理到原來呢啲感覺結合起來是,「我餓了」。
所以語言嘅多文化共生,
其實也是世界觀的多文化共生。
就是因為咁,
我用咗廣東話來寫呢篇報告。
從象徵意義嘅角度講,明嘅。
當然用廣東話寫我亦較能知道自己講乜啦。
唔好意思,浮光掠影,
但預計千字左右,已經爆晒字。
他日有機會詳談啦。
人生嘅嘢,來日方長。